جھوٹ

ضیاء الحق کی بڑی  سی تصویر نیلم دریا کے کنارے چلتی جا رہی ہے، اسطرح کہ خود اُسکی ننھی سی ٹانگیں نکل آئی ہوں۔ کشمیر لبریشن فرنٹ کے نعرے " کشمیر بنے گا خودمختار" سی ایم ایچ کی دیوار پر لکھے ہیں، جنھیں جنرل ضیاء کی تصویر بڑی نفرت کی نگاہ سے گھور رہی ہے۔

 " کشمیر بنے گا ۔۔۔"

 تصویر نے یوں نعرا لگایا جیسے اس کے گرد ایک جمِ غفیر ہو جو ببانگ دہل، جوابا نعرا لگا رہا ہو 

" پاکستان"۔

افغن ٹی ہاوس کے بھدے سبز پینٹ کی پپڑیاں بس اکھڑنے کو ہیں، دیوار کے عین وسط میں یاسر عرافات کی تصویر  آویزاں ہے۔ اسد  اپنے باپ کی طرف دیکھتا ہے اور اسکا اشارہ ملتے ہی ہتھوڑی اور میخ اٹھا کر دیوار کی طرف بڑھتا ہے۔ چند منٹوں بعد ہی اب افغن ٹی ہاوس میں یاسر عرافات اور جنرل ضیاء دونوں ٹنگے ہیں۔ ٹی ہاوس کے ہر گاہک کو پتا ہے کہ یہودیوں اور لادینی روسیوں کو سروناش کرنے والے دو وردی پوش مجاہد افغن ٹی ہاوس میں رہتے ہیں۔

اسد تصویر لٹکاتے ہی فورا اس ڈبے کی طرف دوڑتا ہے جس میں رومی کی پُتلی ادھ موئی پڑی ہے۔

 اسد کے ہاتھوں میں آتے ہی رومی کی مردہ پتلی میں جان پھونک دی جاتی۔ گھومتی ہوئی اس رقص کناں پتلی میں شمس تبریزی کی گرو دکشنا کا گیان بانٹ ہوتا۔

در دو چشم من نشین ای آن که از من منتری

 تا قمر را وانمایم کز قمر روشنتری

ہر شعر ،ہر استعارہ ، ہر تلمیح اس پتلی کے گرد رقص کرتے۔  

پر ایک چپت کی دیر تھی کہ سب استعارے و تلمیحات اپر اڈے کی دھول میں ڈھیر ہو گئے۔

" کام نہیں کرنا؟ کتنا کام پڑا ہے"

اسد اپنے باپ کے اس اچانک غصے سے بوکھلا گیا اور بھیں بھیں کر کے رونے لگا۔ اتنا رویا ، اتنا رویا کہ نیلم دریا میں سیلاب آ گیا۔

یہ ۹ ستمبر ۱۹۹۲ کی بات ہے جب بارش کے گہرے بادل خلیج بنگال سے یہ ٹھان کے نکلے تھے کہ مظفرآباد  میں بیٹھے اسد اور اس کے باپ کو برباد کر دیں گے۔ بارش کا زور تھا کہ ٹوٹتا ہی نہ تھا۔ اسد نے بادلوں کو کئی بار تھم جانے کو کہا جو ہمیشہ اس کے کہنے پر رک جایا کرتے تھے، لیکن اب کے وہ تھمنے کے نہ تھے۔ ایک سیلِ سیال تھا اور محکمہ جنگلات کی جی حضوری کرتے سارے درختوں کی گیلیاں نیلم پل کے نیچے سے گزر رہی تھیں۔ بڑے بڑے شیھ جوان، جنھیں اپنی طاقت پر ناز تھا اس سیلاب کی لہروں سے بھڑ گئے۔ پر سیلاب نے ان شیھ جوانوں کے گھمنڈ کو ایک آن میں نوچ کھایا۔ اسد نے دیکھا کہ ایک نوجوان نے ایک گیلی پر چھلانگ لگائی، وہ گیلی نہیں تھی اس نوجوان کے خانوادے کی بھوک کا علاج تھی، ان کی خوشیوں کی نوید تھی، اس نوجوان کے ہاتھ میں رسی تھی جب کہ دوسری سرا لئے اس کا دوست منتظر تھا کہ گیلی کے گرد رسی لپٹتے ہی وہ اس رسی کو یوں کھینچے گا کہ  اس کا دوست اور گیلی دونوں واپس آ جائیں گے، پر جب سیلاب کی لہروں کے بازوؤں سے زور آزمائی ہوئی تو نہ گیلی ہاتھ لگی نہ دوست واپس آیا۔ پانچ سالہ اسد نے دیکھا کہ اس سیلاب میں مردہ جانوروں کی لاشیں تیر رہی تھیں۔ اسد نے ایک لنگور کو  اپنی زندگی کی آخری جست لگاتے ہوئے دیکھا، جن ڈالیوں سے وہ لٹکا کرتا تھا آج وہ ڈالیاں بھی ہار مان بیٹھی تھیں۔ نیلم دریا کے کنارے بنے نیلم پارک کے جھولے جہاں وہ پہروں کھیلا کرتا تھا نیست و نابود ہو چکے تھے۔  اسد نے سوچا کہ پُتلیوں کی طرح اس سیلاب کو بھی رسیاں ڈالی جا سکتی ہوں گی۔ یہ سوچتے ہی اسے رومی کا خیال آیا اور وہ گھر کی طرف دوڑا۔